कर्नाटकातील गाजलेल्या रेणुकास्वामी हत्याकांड प्रकरणात सुप्रीम कोर्टाने गुरुवारी महत्त्वाचा निर्णय दिला आहे. कन्नड चित्रपटसृष्टीतील लोकप्रिय अभिनेता दर्शन थोगुदीपा, अभिनेत्री पवित्रा गौडा आणि इतर 5 आरोपींची जामीन रद्द करण्यात आली आहे. कर्नाटक उच्च न्यायालयाकडून मिळालेला पवित्रा गौडाचा जामीन सर्वोच्च न्यायालयाने रद्द केल्यानंतर काही मिनिटांतच तिची अटक करण्यात आली. कोर्टाने आदेश दिल्यानंतर पोलिसांनी तिला तात्काळ ताब्यात घेतले.
आरोपी कोण कोण?
या प्रकरणातील मुख्य आरोपींमध्ये पवित्रा गौडा, अभिनेता दर्शन थोगुदीपा, जगदीश उर्फ ‘जग्गा’, अनु कुमार उर्फ ‘अनु’, नागराज उर्फ ‘नागा’, दर्शनचा मॅनेजर आणि आणखी एक आरोपी लक्ष्मण यांचा समावेश आहे. या सर्वांना अटक करण्यासाठी पोलिसांनी 9 विशेष पथके तयार केली होती. पोलिसांनी प्रदूष नावाच्या आरोपीला गिरिनगर येथील घरातून पकडले, तर नागराजला मॅसूरमधील टी नरसीपुरा रोडवरील दर्शनच्या फार्महाऊसवरून ताब्यात घेण्यात आले. प्रदूष आणि पवित्रा गौडाला अन्नपूर्णेश्वरी नगर पोलिस स्टेशनमध्ये नेण्यात आले आहे.
घटना कशी घडली?
ही घटना 9 जून 2024 रोजी बेंगळुरूच्या पटनगेरे गावात घडली होती. 33 वर्षीय ऑटोचालक रेणुकास्वामी हा अभिनेता दर्शनचा चाहता होता. पोलिसांच्या माहितीनुसार, त्याने पवित्रा गौडाला सोशल मीडियावर आक्षेपार्ह संदेश पाठवले होते. त्यानंतर, दर्शनच्या सूचनेवरून रेणुकास्वामीचे अपहरण करण्यात आले, त्याला 3 दिवस एका शेडमध्ये कैद करून निर्दयपणे मारहाण करण्यात आली आणि अखेरीस ठार करण्यात आले. त्याचा मृतदेह एका फ्लायओव्हरखाली सापडला.
अटक आणि प्रकरणाची चर्चा
या घटनेनंतर 11 जून 2024 रोजी दर्शन थोगुदीपा आणि पवित्रा गौडाला अपहरण आणि खूनाच्या आरोपाखाली अटक करण्यात आली. या प्रकरणाने संपूर्ण कर्नाटक आणि मनोरंजन विश्वात खळबळ उडवली होती. आता सर्वोच्च न्यायालयाच्या निर्णयामुळे पुन्हा एकदा या हत्याकांडाने चर्चेचा विषय बनला आहे.
Disclaimer: ही बातमी विविध वृत्तसंस्थांकडून मिळालेल्या माहितीच्या आधारे तयार करण्यात आली आहे. या प्रकरणातील सर्व आरोप न्यायालयीन प्रक्रियेत सिद्ध होईपर्यंत ते फक्त आरोप म्हणूनच मानले जातील.
