महाराष्ट्र | २० ऑक्टोबर २०२५ — अतिवृष्टी आणि पुराचा फटका बसलेल्या महाराष्ट्र व कर्नाटक राज्यांना केंद्र सरकारकडून मोठा दिलासा देण्यात आला आहे. केंद्रीय गृहमंत्री अमित शहा यांनी दोन्ही राज्यांसाठी एकूण १९५० कोटी ८० लाख रुपयांचा दुसरा हप्ता मंजूर केला आहे.
महाराष्ट्राला १५६६ कोटी तर कर्नाटकाला ३८३ कोटी
या निधीपैकी महाराष्ट्राला १५६६ कोटी ४० लाख रुपये तर कर्नाटकला ३८३ कोटी ४० लाख रुपये मिळणार आहेत. राज्य आपत्कालीन प्रतिसाद निधी (एसडीआरएफ) मधील केंद्राचा वाटा म्हणून हा निधी दिला जाणार असून पूरग्रस्त भागांतील पुनर्वसन आणि दुरुस्ती कामांसाठी ही रक्कम वापरण्यात येईल.
सरकारकडून तातडीची मदत — दुष्काळग्रस्तांनाही आधार
केंद्र सरकारने रविवारी जारी केलेल्या निवेदनात सांगितले की, दुष्काळ आणि पूरग्रस्तांना तातडीची मदत देण्यास सरकार कटिबद्ध आहे. ‘एसडीआरएफ’ अंतर्गत यंदा २७ राज्यांना १३ हजार ६०३ कोटी रुपयांचा निधी वितरित करण्यात आला आहे. तसेच ‘राष्ट्रीय नैसर्गिक आपत्ती निधी’ (एनडीएमएफ) अंतर्गत २१८९ कोटी रुपयांचा निधी देण्यात आला आहे.
केंद्राचा अतिरिक्त निधी — आपत्ती काळात मदतीसाठी पावले
केंद्राने राज्य आपत्ती निवारण निधी (एसडीएमएफ) अंतर्गत २१ राज्यांना ४५७१ कोटींची मदत केली आहे. तसेच एनडीएमएफ अंतर्गत ३७२ कोटी रुपयांचा निधी दिला गेला आहे. नैसर्गिक आपत्तीच्या काळात पंतप्रधान नरेंद्र मोदी यांच्या नेतृत्वाखाली केंद्र सरकार कटिबद्ध असल्याचे सरकारने स्पष्ट केले आहे. एनडीआरएफ, लष्कर आणि हवाई दलाच्या मदतीने पूरग्रस्तांना तातडीची मदत देण्यात आली आहे.
शेतकऱ्यांना मदतीचा हात — फडणवीस यांची प्रतिक्रिया
मॉन्सून काळात नुकसान झालेल्या शेतकऱ्यांना मदत म्हणून केंद्राने ‘एनडीआरएफ’चा दुसरा हप्ता जारी केला आहे. ही अग्रिम मदत असून अंतिम निधी वाटपाची प्रक्रिया अद्याप सुरू असल्याचे मुख्यमंत्री देवेंद्र फडणवीस यांनी सांगितले.
