कर्मचारी भविष्य निर्वाह निधी संघटना (EPFO) आपल्या सदस्यांसाठी एक मोठी सुविधा लागू करण्याच्या तयारीत आहे. लवकरच PF कर्मचाऱ्यांना थेट ATM मधून रक्कम काढता येणार आहे. जानेवारीच्या अखेरपर्यंत किंवा फेब्रुवारीच्या पहिल्या आठवड्यात ही सुविधा सुरू होण्याची शक्यता व्यक्त केली जात आहे. सध्या PF रक्कम मिळवण्यासाठी ऑनलाइन दावा करावा लागतो, त्यानंतर 8 ते 12 दिवस मंजुरीसाठी लागतात. अनेकदा दावे नाकारले जातात किंवा विलंब होतो. परंतु ही नवीन ATM सुविधा लागू झाल्यास गरजेनुसार त्वरित रक्कम मिळू शकणार आहे.
कोणत्या कर्मचाऱ्यांना होणार मोठा फायदा?
जर EPFO ची ATM सुविधा लागू झाली, तर देशभरातील 7 कोटीहून अधिक सदस्यांना थेट फायदा होणार आहे. यांपैकी मोठा वर्ग हा खासगी क्षेत्रात काम करणाऱ्या कर्मचाऱ्यांचा आहे. सध्या EPFO कडे ₹28 लाख कोटींहून अधिक निधी जमा आहे. दरमहा सुमारे 7.8 कोटी सदस्य PF मध्ये योगदान करतात. वर्षानुवर्षे या संख्येत सातत्याने वाढ होत आहे.
EPFO जारी करणार विशेष कार्ड
कामगार मंत्रालयाच्या सूत्रांनुसार, कर्मचाऱ्यांना PF रक्कम काढताना येणारा त्रास दूर करण्यासाठी ही योजना महत्त्वपूर्ण ठरेल. यासाठी EPFO आणि RBI यांच्यात प्राथमिक चर्चा झाली आहे. योजनेनुसार EPFO आपल्या सदस्यांना विशेष कार्ड देणार आहे. या कार्डद्वारे कोणत्याही ATM मधून थेट PF रक्कम काढता येईल. तसेच केंद्र सरकारने PF कर्मचाऱ्यांसाठी स्वयंचलित दावा सेटलमेंटची मर्यादा वाढवून ₹5 लाख केली आहे.
तातडीच्या परिस्थितीत मोठा दिलासा
तज्ज्ञांचे म्हणणे आहे की ATM सुविधा मिळाल्यानंतर EPF खाते अधिक उपयुक्त ठरेल. तातडीच्या परिस्थितीत हॉस्पिटल बिल, घरगुती गरज किंवा अन्य खर्चांसाठी PF मधून त्वरित रक्कम काढता येईल. सध्या दावा प्रक्रियेतील विलंबामुळे अनेकांना तत्काळ रक्कम मिळण्यात अडचणी येतात, पण नवीन प्रणालीमुळे ही समस्या मोठ्या प्रमाणावर दूर होईल.
