कर्मचारी भविष्य निधी संघटना (EPFO) कडून लाखो कर्मचाऱ्यांना मोठी भेट मिळू शकते. सध्या 1000 रुपयांची असलेली EPFO ची Minimum Pension वाढवण्याचा प्रस्ताव तयार करण्यात आला आहे. 10 आणि 11 ऑक्टोबर रोजी बंगळुरू येथे सेंट्रल बोर्ड ऑफ ट्रस्टीज (CBT) च्या बैठकीत या प्रस्तावावर चर्चा झाली.
सध्या किती आहे EPFO ची किमान पेन्शन?
सध्या कर्मचारी पेन्शन योजना (EPS) अंतर्गत किमान पेन्शन रक्कम 1000 रुपये प्रति महिना आहे. गेल्या अनेक वर्षांपासून या रकमेत वाढ करण्याची मागणी होत आहे. उपलब्ध माहितीनुसार, बैठकीत ही रक्कम वाढवण्याच्या प्रस्तावावर चर्चा झाली.
तब्बल 11 वर्षांनंतर बदल होणार?
EPFO अंतर्गत Employee Pension Scheme (EPS-95) मध्ये शेवटचा बदल 2014 साली झाला होता. तेव्हा किमान पेन्शन 1000 रुपये करण्यात आली होती. त्यानंतर महागाई आणि जीवनमानाच्या खर्चात मोठी वाढ झाली आहे, त्यामुळे कर्मचारी संघटना आणि पेंशनधारक संस्था सातत्याने या रकमेच्या वाढीची मागणी करत आहेत.
लाखो पेन्शनधारकांना दिलासा मिळणार का?
माध्यमांच्या अहवालानुसार, अनेक पेन्शनर्स असोसिएशन्सनी EPFO पेन्शनची रक्कम 1000 वरून थेट 7500 रुपये प्रति महिना करण्याची मागणी केली आहे. मात्र, CBT सूत्रांच्या मते इतकी मोठी वाढ तातडीने शक्य नाही. त्याऐवजी 2500 रुपयांपर्यंत वाढ करण्यावर विचार सुरू आहे. जर हा प्रस्ताव पास झाला, तर लाखो पेन्शनभोगींना मोठा दिलासा मिळेल.
पुढे काय होणार?
CBT च्या बैठकीनंतर प्रस्तावावर अंतिम निर्णय घेण्यात येईल आणि केंद्र सरकारची मंजुरी मिळाल्यानंतर नवीन Minimum Pension दर लागू होण्याची शक्यता आहे. EPFO कडून येत्या काही दिवसांत अधिकृत घोषणा केली जाऊ शकते.
