सरकारी नोकरीचे स्वप्न पाहणाऱ्या तरुणांसाठी एक उत्तम संधी उपलब्ध झाली आहे. केंद्रीय राखीव पोलीस दल (CRPF) ने वर्ष 2026 साठी कॉन्स्टेबल भरतीचे अधिकृत अधिसूचना जाहीर केली आहे. या भरती मोहिमेत एकूण 9,195 पदे भरली जाणार आहेत. या पदांसाठी अर्ज प्रक्रिया सोमवार, म्हणजेच 20 एप्रिल 2026 पासून सुरू होत असून इच्छुक उमेदवार 19 मे 2026 पर्यंत ऑनलाइन अर्ज करू शकतात.
कोणत्या पदांसाठी किती जागा?
या भरतीमध्ये विविध ट्रेड्स आणि तांत्रिक पदांचा समावेश करण्यात आला आहे. एकूण 9,195 पदांपैकी 9,096 पदे पुरुष उमेदवारांसाठी असून 79 पदे महिला उमेदवारांसाठी राखीव आहेत. याशिवाय पायनियर विंगसाठी 20 पदे भरली जाणार आहेत.
या अंतर्गत ड्रायव्हर, स्वयंपाकी, सुतार, शिंपी, नाई, धुणी कामगार आणि सफाई कर्मचारी अशा महत्त्वाच्या पदांचा समावेश आहे. नियुक्त्या राज्य आणि केंद्रशासित प्रदेशांच्या आधारे केल्या जातील, तर पायनियर विंगसाठी भरती अखिल भारतीय स्तरावर होईल.
वयोमर्यादा आणि पात्रता
या पदांसाठी अर्ज करण्यासाठी किमान पात्रता 10वी उत्तीर्ण असणे आवश्यक आहे. काही तांत्रिक किंवा विशिष्ट ट्रेड पदांसाठी ITI प्रमाणपत्र किंवा संबंधित अनुभव आवश्यक असू शकतो.
ड्रायव्हर पदासाठी अर्ज करणाऱ्या उमेदवारांचे वय 21 ते 27 वर्षांदरम्यान असावे. इतर सर्व पदांसाठी वयोमर्यादा 18 ते 23 वर्षे निश्चित करण्यात आली आहे. राखीव प्रवर्गातील उमेदवारांना शासनाच्या नियमांनुसार वयोमर्यादेत सवलत दिली जाईल.
अर्ज शुल्क आणि वेतन
इच्छुक उमेदवार 20 एप्रिल 2026 ते 19 मे 2026 या कालावधीत अधिकृत वेबसाइट rect.crpf.gov.in वर जाऊन ऑनलाइन अर्ज करू शकतात. अर्ज शुल्क देखील याच कालावधीत भरावे लागेल.
General, OBC आणि EWS प्रवर्गातील पुरुष उमेदवारांसाठी अर्ज शुल्क 100 रुपये ठेवण्यात आले आहे. महिला, SC, ST आणि माजी सैनिक उमेदवारांसाठी अर्ज पूर्णपणे मोफत आहे.
निवड झालेल्या उमेदवारांना सातव्या वेतन आयोगानुसार Pay Level-3 अंतर्गत 21,700 रुपये ते 69,100 रुपये इतके वेतन दिले जाईल.
निवड प्रक्रिया
या भरतीची निवड प्रक्रिया पारदर्शक आणि अनेक टप्प्यांमध्ये पार पडणार आहे. उमेदवारांना शारीरिक दक्षता चाचणी (PET), शारीरिक मानक चाचणी (PST), संगणक आधारित परीक्षा (CBT), ट्रेड टेस्ट आणि वैद्यकीय तपासणी अशा टप्प्यांतून जावे लागेल.
लेखी परीक्षेत एकूण 100 गुणांचे प्रश्न विचारले जातील, ज्यामध्ये रीझनिंग, सामान्य ज्ञान, गणित आणि भाषा या विषयांचा समावेश असेल. उमेदवारांनी शेवटच्या क्षणी येणाऱ्या तांत्रिक अडचणी टाळण्यासाठी अर्ज प्रक्रिया वेळेत पूर्ण करावी, असा सल्ला देण्यात येतो.
अर्ज कसा करावा?
- उमेदवारांनी CRPF च्या अधिकृत वेबसाइट rect.crpf.gov.in ला भेट द्यावी.
- त्यानंतर Constable Recruitment 2026 या लिंकवर क्लिक करावे.
- नवीन नोंदणी करून अर्ज फॉर्म भरावा.
- आवश्यक कागदपत्रे अपलोड करावीत.
- अर्ज शुल्क भरून फॉर्म सबमिट करावा आणि त्याची प्रिंट काढून ठेवावी.
