भारतीय स्टेट बँक (SBI) ने आपल्या लोकप्रिय Auto Sweep Deposit म्हणजेच Multi Option Deposit Scheme (MODS) मध्ये मोठा बदल केला आहे. बँकेने ऑटो स्वीप सुरू होण्यासाठी आवश्यक बॅलेन्स लिमिट वाढवली असून, याचा परिणाम अनेक सेव्हिंग अकाउंट धारकांवर होणार आहे.
नवीन मर्यादा 1 सप्टेंबर 2025 पासून लागू
1 सप्टेंबर 2025 पासून SBI च्या Auto Sweep साठी सेव्हिंग अकाउंटमधील किमान ठेव मर्यादा 15,000 रुपयांनी वाढवण्यात आली आहे. यानुसार आता बचत खात्यात 50,000 रुपयांपेक्षा जास्त रक्कम झाल्यावरच MODS सक्रिय होईल. यापूर्वी ही मर्यादा 35,000 रुपये होती.
ऑटो स्वीप स्कीम म्हणजे काय
Auto Sweep ही अशी बँकिंग सुविधा आहे जी सेव्हिंग अकाउंट आणि Fixed Deposit (FD) यांना जोडते. ठरावीक रकमेपेक्षा जास्त शिल्लक आपोआप FD मध्ये रूपांतरित केली जाते. त्यामुळे ग्राहकांना FD सारखा उच्च व्याजदर मिळतो आणि गरज पडल्यास तीच रक्कम परत सेव्हिंग अकाउंटमध्ये येते. अशा प्रकारे जास्त व्याजदरासोबतच दैनंदिन व्यवहारासाठी लागणारी तरलता कायम राहते.
SBI Auto Sweep कसे कार्य करते
SBI च्या या योजनेत सेव्हिंग अकाउंटमधील अतिरिक्त रक्कम आपोआप FD मध्ये ट्रान्सफर केली जाते. नंतर अकाउंटमधील बॅलन्स कमी पडल्यास बँक Reverse Sweep करून आवश्यक रक्कम परत खातेधारकाला उपलब्ध करून देते. बँकेनुसार MODS चे मुख्य उद्दिष्ट म्हणजे ग्राहकांना अतिरिक्त बॅलेन्सवर जास्त व्याज मिळवून देणे आणि आवश्यकतेच्या वेळी तत्काळ पैसा उपलब्ध करणे हा आहे.
अल्पवयीन खातेधारकांसाठीही उपलब्ध
MOD खाते एकट्या व्यक्तीच्या, संयुक्त किंवा अल्पवयीनच्या नावानेही उघडता येते. प्रत्येक ऑटो स्वीप अकाउंटचा किमान कालावधी 1 वर्ष असतो, मात्र गरज पडल्यास मधल्या काळात FD मोडता येते. व्याज तिमाही किंवा कंपाउंडिंग पद्धतीने दिले जाते. वेळेआधी पैसे काढल्यास अल्प दंड लागू शकतो. ही सुविधा ग्राहकांना FD पेक्षा अधिक परतावा देण्याबरोबरच दैनंदिन आर्थिक गरजा पूर्ण करण्यासाठी देखील मदत करते.
वाढलेल्या मर्यादेचा अर्थ
SBI ची Auto Sweep Deposit योजना ही सेव्हिंग अकाउंटवरील कमी व्याजदर आणि FD च्या कठोरतेच्या मधला सोयीस्कर पर्याय आहे. नवीन 50,000 रुपयांची मर्यादा ठेवल्यामुळे फक्त खरोखरच जादा रक्कम MOD मध्ये जाईल, ज्यामुळे ही योजना अधिक व्यवस्थित आणि ग्राहकाभिमुख होईल.
