Gold-Silver Rates: सोने-चांदीच्या दरांनी सध्या थांबण्याचे नाव घेतलेले नाही. आंतरराष्ट्रीय बाजारात प्रचंड तेजी दिसत असून त्याचे पडसाद थेट भारतीय वायदा बाजारात उमटले आहेत. मंगळवारी मल्टी कमोडिटी एक्सचेंजवर व्यवहार सुरू होताच सोने आणि चांदीच्या दरांनी एकाच वेळी मोठी उसळी घेत गुंतवणूकदारांचे लक्ष वेधून घेतले.
चांदीचा वेग कायम
मंगळवारी एमसीएक्सवर 5 मार्च एक्सपायरीच्या चांदीने व्यवहाराच्या सुरुवातीलाच नवा विक्रम केला. चांदीचा दर थेट 3,59,800 रुपये प्रति किलो या आतापर्यंतच्या उच्चांकी पातळीवर पोहोचला. याआधी शुक्रवारी चांदीचा दर 3,34,699 रुपये प्रति किलोवर बंद झाला होता. म्हणजेच अवघ्या एका सत्रात चांदीच्या दरात 25,101 रुपयांची मोठी वाढ नोंदवली गेली.
सोन्याचाही जोरदार झटका
चांदीप्रमाणेच सोन्याचाही दर तितक्याच वेगाने वाढताना दिसला. एमसीएक्सवर 5 फेब्रुवारी एक्सपायरीच्या सोन्याचा दर व्यवहार सुरू होताच 1,59,820 रुपये प्रति 10 ग्रॅमवर पोहोचला. शुक्रवारी बंद झालेल्या 1,56,037 रुपयांच्या तुलनेत हा दर 3,783 रुपयांनी वाढला आहे. विशेष म्हणजे 1 जानेवारीपासून आतापर्यंत सोन्याच्या दरात एकूण 24,016 रुपयांची वाढ झाली आहे.
दरवाढीमागची कारणे
सोने आणि चांदीच्या दरांमध्ये सुरू असलेल्या या सातत्यपूर्ण तेजीमागे अनेक जागतिक घडामोडी कारणीभूत ठरत आहेत. अमेरिकन डॉलरमध्ये सुरू असलेली कमजोरी आणि आगामी काळात व्याजदर कपातीची शक्यता यामुळे मौल्यवान धातूंना आधार मिळतो आहे. याशिवाय अनेक देशांच्या मध्यवर्ती बँका आपला gold reserve वाढवत असून त्याचा थेट परिणाम बाजारावर दिसून येतो.
जागतिक तणावाचा परिणाम
मध्य पूर्वेत पुन्हा एकदा तणाव वाढत असल्याने गुंतवणूकदार सुरक्षित गुंतवणुकीकडे वळताना दिसत आहेत. अमेरिकेचे इराणविरोधातील संभाव्य कारवाईचे संकेत, तसेच युद्धनौका आणि विमानवाहू नौका या भागात दाखल झाल्याच्या बातम्यांमुळे बाजारात अनिश्चिततेचे वातावरण निर्माण झाले आहे. या पार्श्वभूमीवर safe investment म्हणून सोने आणि चांदीकडे मोठ्या प्रमाणात ओढा वाढला असून त्याचेच प्रतिबिंब दरवाढीत दिसून येत आहे.
