SBI Jannivesh SIP: एसबीआयने देशातील गरीब आणि कामगार वर्गापर्यंत म्युच्युअल फंड पोहोचवण्यासाठी नवा प्लान सादर केला आहे. यात अत्यल्प रकमेपासून SIP सुरू करता येणार आहे.
तुम्हाला आठवत असेल की मोदी सरकारने प्रत्येक नागरिकाचे बँक खाते असावे यासाठी जनधन योजना सुरू केली होती आणि आजपर्यंत जवळपास 50 कोटी लोकांची खाती उघडली गेली आहेत. त्याच धर्तीवर आता प्रत्येक व्यक्तीपर्यंत गुंतवणुकीची संधी पोहोचवण्यासाठी सरकारने जननिवेश योजना सुरू केली आहे. या अंतर्गत देशातील जास्तीत जास्त लोकांना म्युच्युअल फंड आणि SIP शी जोडण्याचे उद्दिष्ट आहे.
एसबीआय जननिवेश SIP सुरू
एसबीआयने जननिवेश SIP ची सुरुवात केली आहे. 17 फेब्रुवारी म्हणजेच आज SEBIच्या चेअरपर्सन माधबी पुरी बुच आणि एसबीआयचे चेअरमन सीएस शेट्टी याची अधिकृत घोषणा करतील. यामागील उद्देश म्हणजे प्रत्येक व्यक्तीला गुंतवणुकीपर्यंत पोहोचवणे. एसबीआय व्यतिरिक्त इतर म्युच्युअल फंड हाऊसेसही असेच गुंतवणूक पर्याय सुरू करतील. एसबीआयने विकसित भारत यात्रा पुढे नेण्यासाठी ही योजना सुरू केली आहे, ज्यामध्ये कमी रकमेपासून गुंतवणूक करण्याचा पर्याय उपलब्ध होईल.
यामध्ये विशेष काय आहे?
एसबीआय जननिवेश SIP चे सर्वात मोठे वैशिष्ट्य म्हणजे ते प्रत्येकासाठी उपलब्ध आहे. यामध्ये फक्त 250 रुपयांच्या किमान रकमेपासून SIP सुरू करता येईल. सध्या म्युच्युअल फंडामध्ये किमान 500 रुपयांपासून गुंतवणूक सुरू करावी लागते. देशातील फेरीवाले आणि कामगार वर्गालाही म्युच्युअल फंडशी जोडण्यासाठी हा निर्णय घेण्यात आला आहे.
किती मोठा फंड तयार होऊ शकतो?
जर एखाद्या व्यक्तीने मुलगी जन्मल्यावरच दरमहा 250 रुपयांची SIP सुरू केली आणि सलग 25 वर्षे गुंतवणूक केली, तर सरासरी 12% परतावा मिळाल्यास, संपूर्ण कालावधीत फक्त 75,000 रुपये गुंतवले जातील आणि त्याच्या बदल्यात 4,74,409 रुपये मिळतील. त्यातील जवळपास 4 लाख रुपये केवळ व्याज म्हणून मिळतील.
म्युच्युअल फंडच का?
सरकार गरीब आणि कामगार वर्गाला म्युच्युअल फंडशी जोडण्याचा प्रयत्न का करत आहे? याचे उत्तर म्हणजे, गेल्या 20 वर्षांतील म्युच्युअल फंडांचे प्रभावी प्रदर्शन. या गुंतवणूक पर्यायाने गेल्या दोन दशकांत 15 ते 20 पटपर्यंत परतावा दिला आहे. त्याउलट FD आणि PPF सारख्या पर्यायांनी केवळ 4 ते 5 पट परतावा दिला आहे.
