7th pay commission: जानेवारी 2026 पासून लागू होणाऱ्या महागाई भत्ता (DA) आणि महागाई राहत (DR) वाढीबाबत कर्मचाऱ्यांना मोठी अपेक्षा होती. मात्र यावेळी वाढ केवळ 2% इतकीच राहण्याची शक्यता व्यक्त केली जात आहे. सध्या केंद्र कर्मचाऱ्यांना 58% DA मिळतो आणि नव्या दरानुसार तो 60% होईल. गेल्या सात वर्षांतील ही सर्वात कमी वाढ मानली जात आहे.
महागाई निर्देशांक काय सांगतो?
महागाई भत्ता वाढवताना AICPI-IW या औद्योगिक कामगार उपभोक्ता किंमत निर्देशांकाचा आधार घेतला जातो. जुलै 2025 ते ऑक्टोबर 2025 या काळात निर्देशांकात सतत वाढ दिसली आहे. याचा अर्थ महागाई वाढत आहे, मात्र निर्देशांकातील वाढ इतकी मोठी नाही की त्यावर DA 61% करण्याचा आधार मिळेल.
7व्या वेतन आयोगाचा शेवटचा टप्पा
7व्या वेतन आयोगाचा 10 वर्षांचा कालावधी 31 डिसेंबर 2025 रोजी संपत आहे. त्यामुळे जानेवारी 2026 मधील DA सुधारणा ही आयोग संपल्यानंतर होणारी पहिली सुधारणा ठरणार आहे. दरम्यान, 8वा वेतन आयोग कार्यरत झाला असला तरी त्याच्या ToR मध्ये लागू करण्याची तारीख स्पष्ट नाही.
8व्या वेतन आयोगाचा लाभ कधी?
आयोगाकडे अहवाल सादर करण्यासाठी 18 महिने आहेत. साधारणपणे अहवालानंतर नवी वेतनरचना लागू होण्यासाठी 1–2 वर्षे अतिरिक्त लागतात. त्यामुळे प्रत्यक्ष लाभ 2027 च्या अखेरीस किंवा 2028 च्या सुरुवातीला मिळण्याची शक्यता आहे.
कर्मचाऱ्यांची वाढती चिंता
कर्मचाऱ्यांच्या चिंतेचा केंद्रबिंदू असा आहे की जानेवारी 2026 पासून नवी वेतनरचना लागू होणार की नाही, याबाबत सरकारने संसदेत स्पष्ट भूमिका मांडलेली नाही. त्यामुळे काही वर्षे महागाई भत्त्याची वाढ विद्यमान रचनेनुसारच होण्याची शक्यता आहे.
DA वाढ भविष्यातील पगारावर कसा परिणाम करेल?
8वा वेतन आयोग लागू होताना त्या वेळचा DA बेसिक पगारात समाविष्ट केला जातो आणि मग DA शून्यापासून पुन्हा सुरू होतो. म्हणजे जानेवारी 2026 ते जुलै 2027 दरम्यान होणाऱ्या चार DA सुधारणा आपल्या नव्या बेसिक पगारावर प्रभाव टाकणार आहेत. यामुळेच कर्मचाऱ्यांसाठी ही छोट्या वाढीची सुध्दा अत्यंत महत्त्वाची ठरते.
