2012 चा भारत आठवला, की रस्त्यांवर प्रामुख्याने हॅचबॅकच दिसायच्या. SUV म्हणजे महागडी गाडी किंवा सर्वसामान्यांसाठी फक्त एक स्वप्न. अशा काळात रेनॉ डस्टरने भारतीय बाजारात प्रवेश केला आणि चित्रच बदलले. शहरातील उड्डाणपूल असो वा गावाकडचा कच्चा रस्ता, डस्टरने हे दाखवून दिले की SUV ही केवळ ऐषआरामाची गोष्ट नाही, तर सामान्य कुटुंबालाही परवडणारी असू शकते. जवळपास दीड दशकानंतर तोच डस्टर आता नव्या रूपात पुन्हा एकदा भारतीय रस्त्यांवर उतरला आहे.
चेन्नईतून नव्या प्रवासाची सुरुवात
प्रजासत्ताक दिनाच्या मुहूर्तावर फ्रेंच वाहन निर्माता रेनॉने चेन्नईतील जवाहरलाल नेहरू स्टेडियममध्ये नव्या Renault Duster चे सादरीकरण केले. अनेक ऐतिहासिक क्षणांची साक्ष असलेल्या या मैदानातून डस्टरने आपली नवी इनिंग सुरू केली आहे. कंपनीच्या मते, हा केवळ एक मॉडेल परत आणण्याचा निर्णय नाही, तर भारतासाठी खास तयार केलेली SUV पुन्हा एकदा लोकांसमोर आणण्याचा प्रयत्न आहे.
भारतासाठी खास प्लॅटफॉर्म
रेनॉ इंडिया आणि रेनॉ ग्रुपच्या वरिष्ठ अधिकाऱ्यांनी सांगितले की, नवी डस्टर Renault Group Modular Platform (RGMP) वर विकसित करण्यात आली आहे. हा प्लॅटफॉर्म विशेषतः भारतीय बाजार लक्षात घेऊन तयार करण्यात आला आहे. वाहनात सुमारे 90 टक्के देशांतर्गत घटक वापरण्यात आले असून त्यामुळे किंमत नियंत्रणात ठेवण्यास मदत होणार आहे. कंपनीच्या मते, ही SUV हाताळणीच्या बाबतीत आपल्या वर्गातील सर्वोत्तम अनुभव देईल.
लूक आणि डिझाइनमध्ये मोठा बदल
नव्या डस्टरचा आकार जागतिक मॉडेलसारखाच असला, तरी समोरून पाहिल्यावर ती वेगळी ओळख निर्माण करते. आयब्रू शेप LED DRL, वेगळ्या डिझाइनची ग्रिल आणि समोर उठावदार सिल्व्हर फिनिश बंपर देण्यात आला आहे. बाजूने पाहिल्यास काळ्या रंगाची क्लॅडिंग, रूफ रेल्स आणि C-पिलरवर दिलेले मागील दरवाज्याचे हँडल्स SUV चा दमदार स्वभाव अधोरेखित करतात. मागील बाजूस LED टेललॅम्प्स, रूफ माउंटेड स्पॉइलर आणि सिल्व्हर फिनिश बंपर मिळतो.
तीन इंजिन पर्याय, हायब्रिडवर विशेष भर
नव्या डस्टरमध्ये एकूण 3 इंजिन पर्याय देण्यात आले आहेत. त्यामध्ये 1.8 लिटर स्ट्रॉंग हायब्रिड पेट्रोल इंजिन प्रमुख आहे. कंपनीचा दावा आहे की शहरातील वापरात ही SUV सुमारे 80 टक्के वेळ इलेक्ट्रिक मोडमध्ये चालू शकते. याशिवाय 1.3 लिटर टर्बो पेट्रोल इंजिन आणि 1.0 लिटर टर्बो पेट्रोल इंजिनचा पर्याय देण्यात आला आहे. वेगवेगळ्या गरजांसाठी वेगवेगळे इंजिन पर्याय देऊन कंपनीने शहर आणि महामार्ग दोन्ही वापर लक्षात घेतले आहेत.
केबिनमध्ये प्रीमियम अनुभव
नव्या डस्टरचा केबिन जागतिक मॉडेलवर आधारित असला, तरी भारतीय आवृत्तीत अधिक प्रीमियम साहित्य वापरण्यात आले आहे. काळ्या रंगाच्या केबिनमध्ये हिरव्या रंगाची स्टिचिंग, डिजिटल इन्स्ट्रुमेंट क्लस्टर, मोठी टचस्क्रीन आणि ड्रायव्हर-केंद्रित डॅशबोर्ड देण्यात आला आहे. मागील आसनांवर सेंटर आर्मरेस्ट आणि कपहोल्डर्सही उपलब्ध आहेत.
फीचर्समध्ये कोणतीही तडजोड नाही
या SUV मध्ये 10.1 इंच टचस्क्रीन, वायरलेस Android Auto आणि Apple CarPlay, डिजिटल डिस्प्ले, पॅनोरॅमिक सनरूफ, वायरलेस चार्जिंग, ड्युअल झोन क्लायमेट कंट्रोल आणि 6-वे पावर्ड व व्हेंटिलेटेड फ्रंट सीट्स देण्यात आल्या आहेत. सुरक्षिततेसाठी 6 एअरबॅग्स, 360 डिग्री कॅमेरा, टायर प्रेशर मॉनिटरिंग सिस्टम आणि Level 2 ADAS फीचर्स मिळतात. भारतात ADAS सुविधा देणारी ही रेनॉची पहिली कार ठरणार आहे.
गूगल असिस्टन्स आणि कनेक्टेड टेक्नॉलॉजी
केबिनमध्ये इनबिल्ट Google Assistance देण्यात आली असून वाहन थेट Google Account शी जोडता येते. त्यामुळे ड्रायव्हिंगदरम्यान नेव्हिगेशन, सूचना आणि इतर डिजिटल सुविधा अधिक सोप्या पद्धतीने वापरता येतात.
बूट स्पेस आणि वापरातील सोय
नव्या डस्टरमध्ये 518 लिटरचे बूट स्पेस देण्यात आले असून ते 700 लिटरपर्यंत वाढवता येते. कंपनीच्या मते, हे आपल्या वर्गातील इतर SUV पेक्षा जास्त आहे. रूफ रेल्सवर 50 किलोपर्यंत भार वाहून नेण्याची क्षमता देण्यात आली आहे, त्यामुळे साहसी प्रवासासाठी ही SUV अधिक उपयुक्त ठरते.
बुकिंग, किंमत आणि डिलिव्हरी वेळापत्रक
रेनॉने नव्या Renault Duster ची बुकिंग सुरू केली असून ग्राहकांना 21,000 रुपयांच्या आगाऊ रकमेवर बुकिंग करता येणार आहे. कंपनीकडून विशेष अॅपद्वारेही बुकिंगची सोय देण्यात आली आहे. अधिकृत किमतींची घोषणा मार्च 2026 मध्ये होणार असून एप्रिलपासून डिलिव्हरी सुरू होईल. सुरुवातीला टर्बो पेट्रोल व्हेरिएंट उपलब्ध होणार असून स्ट्रॉंग हायब्रिडसाठी ग्राहकांना दिवाळीपर्यंत प्रतीक्षा करावी लागणार आहे.
