भारतीय रिझर्व्ह बँकेने (RBI) डिसेंबर महिन्यात रेपो दरात 0.25 टक्क्यांची कपात केल्यानंतर बँकिंग क्षेत्रात व्याजदरात बदल झाले आहेत. यंदा आतापर्यंत एकूण 1.25 टक्क्यांची कपात झाली आहे. या निर्णयानंतर अनेक बँकांनी मुदतठेवींच्या व्याजदरात सुधारणा केली असून सार्वजनिक क्षेत्रातील Union Bank of India नेही 5 डिसेंबरपासून नवे व्याजदर लागू केले आहेत. या पार्श्वभूमीवर, Union Bank of India ची एक ठेवीची योजना सध्या गुंतवणूकदारांचे लक्ष वेधून घेत आहे.
मुदतठेवींवर किती व्याज देत आहे Union Bank
Union Bank of India ही केंद्र सरकारच्या नियंत्रणाखालील सार्वजनिक क्षेत्रातील बँक आहे. या बँकेत किमान 7 दिवसांपासून ते कमाल 10 वर्षांपर्यंत मुदतठेवी करता येतात. सध्याच्या सुधारित दरांनुसार बँक 2.75 टक्क्यांपासून ते 7.05 टक्क्यांपर्यंत व्याज देत आहे. विशेष म्हणजे 400 दिवसांच्या विशेष FD योजनेत सर्वाधिक 6.30 ते 7.05 टक्के व्याजदर मिळतो. तर 2 वर्षांच्या FD योजनेत सामान्य नागरिकांना 6.00 टक्के, ज्येष्ठ नागरिकांना 6.50 टक्के आणि 80 वर्षांवरील अतिज्येष्ठ नागरिकांना 6.75 टक्के व्याज दिले जाते.
1 लाखांच्या ठेवीवर किती परतावा मिळतो?
जर एखाद्या सामान्य नागरिकाने Union Bank of India मध्ये 2 वर्षांसाठी 1,00,000 रुपयांची मुदतठेव केली, तर मुदतपूर्तीवेळी त्याला एकूण 1,12,649 रुपये मिळतात. यामध्ये 12,649 रुपयांचा निश्चित व्याज समाविष्ट असतो.
ज्येष्ठ आणि अतिज्येष्ठ नागरिकांना अधिक फायदा
ज्येष्ठ नागरिकांनी (Senior Citizen) 2 वर्षांच्या FD मध्ये 1,00,000 रुपये गुंतविल्यास त्यांना मुदतपूर्तीवेळी 1,13,764 रुपये मिळतात, म्हणजेच 13,764 रुपयांचा व्याज लाभ होतो. तर 80 वर्षांवरील अतिज्येष्ठ नागरिकांनी हीच रक्कम ठेव केल्यास त्यांना एकूण 1,14,325 रुपये मिळतात, ज्यामध्ये 14,325 रुपयांचा निश्चित व्याज समाविष्ट असतो.
सुरक्षित गुंतवणुकीचा पर्याय
रेपो दर कपातीनंतर अनेक खासगी आणि सरकारी बँकांनी FD वरील व्याजदर कमी केले असताना, Union Bank of India ची ही योजना सुरक्षित गुंतवणूक करणाऱ्यांसाठी दिलासादायक ठरू शकते. विशेषतः ज्येष्ठ नागरिकांसाठी निश्चित परतावा आणि सरकारी बँकेची विश्वासार्हता हा या योजनेचा मोठा फायदा मानला जात आहे.
