खेळाडूंसोबत दौऱ्यावर कुटुंबही; BCCI ने शिथील केला नियम

नवी दिल्ली: भारतीय क्रिकेट नियामक मंडळाने (बीसीसीआय) जुलैमधील वर्ल्ड कप स्पर्धेनंतर खेळाडूंसाठी असलेल्या त्यांच्या कुटुंबीयांसबंधीचा नियम शिथील केला आहे. गेल्याच आठवड्यात संपलेल्या वेस्ट इंडिज दौऱ्यात खेळाडूंना त्यांच्या कुटुंबीयांना दौऱ्यावर घेऊन जाण्याची परवानगी देण्यात आली होती.

बीसीसीआयच्या एका वरिष्ठ अधिकाऱ्यांनी टाइम्स ऑफ इंडियाला सांगितलं की, ‘वर्ल्ड कप स्पर्धेदरम्यान खेळाडूंवर ताण होता. त्यानंतर लगेच वेस्ट इंडिज दौरा होता. त्यामुळे खेळाडूंना त्यांच्या कुटुंबाला सोबत नेण्याची मुभा देणं आवश्यक होतं. वेस्ट इंडिज दौऱ्यानंतरही लगेच पुढचा सीझन सुरू होणार होता. त्यामुळे खेळाडूंना त्यांच्या घरच्यांना वेळ देता येणं कठीण जाणार होतं.’

सर्वोच्च न्यायालयाने स्थापन केलेल्या प्रशासक समिती, कर्णधार, प्रशिक्षक यांच्याशी चर्चा करून बीसीसीआयने खेळाडूंना दौऱ्यांवर असताना त्यांच्या कुटुंबासोबत मर्यादित वेळ घालवता येण्याबाबतची परवानगी दिली आहे. यानुसार, दीर्घ मुदतीच्या दौऱ्यावर पहिले २० दिवस कुटुंबाला भेटू दिलं जात नाही. मात्र नंतरचे दिवस त्यांना एकत्र घालवता येतात. मात्र एका वरिष्ठ खेळाडूने हा नियम वर्ल्ड कप दरम्यान मोडला होता.

वेस्ट इंडिज दौऱ्यादरम्यान, बहुतांश खेळाडूंसोबत त्यांचे कुटुंबीय नव्हते. मात्र विराट कोहलीची पत्नी अभिनेत्री अनुष्का शर्मा संपूर्ण दौऱ्यादरम्यान त्याच्यासोबत होती. त्यांचे फोटोही सोशल मीडियावर व्हायरल होत होते.

‘ही सुविधा प्रत्येक खेळाडूसाठी होती. वेस्ट इंडीज दौऱ्यात तीन वेगवेगळ्या प्रकारचे सामने होते. काही थोडेच खेळाडू तिन्ही प्रकारच्या सामन्यात होते. त्यापैकी विराट होता. तो खूप व्यावसायिक आहे. तो संघासाठी केलेले नियम मोडत नाही. आणि त्याची पत्नी तिच्या स्वतंत्र दौऱ्यावर होती,’ अलं एका अधिकाऱ्यांने सांगितले.