छे, धोनी निवृत्त होणार नाहीयेः एमएसके प्रसाद

नवी दिल्लीः भारतीय संघाचा माजी कर्णधार आणि यष्टिरक्षक महेंद्र सिंह धोनी निवृत्त होणार नाही. धोनीच्या निवृत्तीसंदर्भातील सर्व वृत्ते निराधार आहेत, असे निवड समितीचे प्रमुख एमएसके प्रसाद यांनी स्पष्ट केले. दक्षिण आफ्रिकेविरुद्धच्या कसोटी मालिकेसाठी भारतीय संघाची घोषणा करण्यात आली. त्यावेळी ते बोलत होते.

भारतीय संघाची घोषणा करताना घेतलेल्या पत्रकार परिषदेवेळी धोनीच्या निवृत्तीबाबत प्रश्न विचारण्यात आला. ‘नाही. नक्कीच नाही. धोनीच्या निवृत्तीबाबतचे कोणतेही वृत्त खरे नाही. आपण विचारलेल्या प्रश्नाने मी आश्चर्यचकीत झालो आहे. याबाबत आमच्याकडे कोणतीही माहिती नाही’, असे प्रसाद यांनी सांगितले.

दरम्यान, कर्णधार विराट कोहलीने आपल्या अधिकृत ट्विटर अकाउंटवरून एक पोस्ट शेअर केली. यामध्ये ‘हा सामना मी कधीही विसरू शकणार नाही. या माणसाने (धोनी) जणू फिटनेस टेस्ट असल्यासारखे मला धावायला लावले’, असे विराटने म्हटले. या पोस्टमुळे धोनी निवृत्त होत असल्याची चर्चा नेटकऱ्यांमध्ये चांगलीच रंगली. यावर धोनीची पत्नी साक्षी सिंहने ‘याला अफवा म्हणतात’, अशी पोस्ट शेअर केली आहे.

तत्पूर्वी, खराब कामगिरीमुळे कसोटी संघातून लोकेश राहुलला डच्चू देण्यात आला. राहुलऐवजी शुभमन गिलला संधी देण्यात आली. त्याचप्रमाणे रोहित शर्माचेही पुनरागमन कसोटी संघात झाले आहे.

भारतीय कसोटी संघः –

विराट कोहली (कर्णधार), मयांक अग्रवाल, रोहित शर्मा, चेतेश्वर पुजारा, अजिंक्य रहाणे (उप-कर्णधार), हनुमा विहारी, ऋषभ पंत, वृद्धीमान साहा, रविचंद्रन आश्विन, रविंद्र जाडेजा, कुलदीप यादव, मोहम्मद शमी, जसप्रीत बुमराह, इशांत शर्मा आणि शुभमन गिल.